Wednesday 26 June 2013

അപ്പുവും മാമനും....

മറ്റൊരു രാത്രിയും വന്നണഞ്ഞു 
മുറ്റത്തെ ചേറിൽ പുതഞ്ഞു നിന്നു
മാനത്തെ മാലാഖ കൊണ്ടുവന്നു 
കാർമേഘക്കിണ്ടി ചെരിച്ചു തന്നു 

കുളിരുള്ള തണ്ണിയാൽ കാൽകഴുകി
നനവുള്ള തോർത്താൽ മുഖം തുടച്ചു 
എന്നിട്ടുമാക്കരി പോയിടാതെ 
കുടു കുടെ ചിരി തൂകി രാത്രിമാമൻ

കുസൃതിയാമാപ്പുവാ വാതിലോരെ
പേടിയൊതുക്കിത്തിരക്കി നിന്നു
ഇടിമിന്നൽ വേട്ടത്തിലാകമാനം
കുടു കുടെ ചിരി തൂകി രാത്രിമാമൻ

ചെമ്പകക്കാറ്റാൽ മണം പരത്തി
ചന്ദ്രികത്തോർത്തോന്നു തോളിലിട്ട്‌
ചന്തത്തിൽ ചാരുകസേരയിൻമേൽ
ചാരിയിരിക്കുന്നു രാതിമാമൻ

അപ്പുവിൻ പെങ്ങൾ ഇരുന്നുചൊല്ലും
ഹരിനാമകീർത്തനം കേട്ടുകേട്ടാ
നിലവിളക്കിൽ നോക്കി തലയാട്ടുന്നു
നിസ്സംഗനായുള്ള രാത്രിമാമൻ

ഉണ്ണെടാ അപ്പുവേ എന്ന് ചൊല്ലി - അമ്മ
വള്ളിക്കളസ്സം വലിച്ചീടവേ
പപ്പടം ചുട്ടതിൽ എത്തി നോക്കും
തീറ്റക്കൊതിയനാം രാത്രിമാമൻ

എങ്കിലുമപ്പുവുറങ്ങീടുവാൻ
നെറുകയിൽ മെല്ലെ തലോടിയോരോ
ചീവീടുപാട്ടുകൾ പാടിടുമാ
ചന്തം തികഞ്ഞൊരു രാത്രിമാമൻ !!!!!

Thursday 30 May 2013

അനാമിക

ചിരിയുടെ അറ്റം തേടി 
അവൾ നടന്നു ....
ഇമകൾക്കിടയിൽ പെട്ട് 
ചതഞ്ഞരഞ്ഞ സ്വപ്‌നങ്ങൾ 
കണ്ണുനീരിൽ മുങ്ങി 
മാഞ്ഞു പോയപ്പോൾ 
ചുണ്ടിൻറെ ഒരറ്റം മുതൽ 
മറ്റേ അറ്റം വരെ 
ചിരി വരയ്ക്കാൻ 
അവൾക്കു പ്രയാസം ഉണ്ടായിരുന്നു 
നാവിന്റെ നിറ വ്യത്യാസം 
അക്ഷരങ്ങളെ 
സ്ഥാനം തെറ്റിച്ചു ....!!!
മൂക്കിനു താഴെ 
മൃദുല രോമങ്ങളുടെ പതർച്ച 
വെളിച്ചത്തിൽ 
ഇരുട്ടു കടത്തിവിട്ട പോലെ 
പരുങ്ങി ...
എങ്കിലും നിലനിൽപ്പിനു വേണ്ടി 
അവൾ നിവർന്നു ....
ചിരിയുടെ അറ്റം തേടി 
നടന്നു ..................

Saturday 13 April 2013

ആത്മാരാമൻ

ആത്മാവിനെപ്പോലും ആരാമമാക്കി ഞാൻ
കൊച്ചു പൂവോന്നിൽ ഒളിച്ചിരിക്കും 
എന്നെ ഞാൻ തേടുമ്പോൾ കാണുവാൻ പറ്റാതെ 
ഞാൻ തന്നെ ഇത്തിരി കണ്ണുനനയിക്കും 
ദർപ്പണം നോക്കി ഞാൻ കാട്ടുന്ന ഘോഷ്ടികൾ 
കണ്ടെൻമനസ്സു മയങ്ങീടവേ 
എന്നുടെ ഭംഗി കണ്ടീലോകമൊക്കെ ഞാൻ 
ഊറ്റിക്കുടിച്ചെൻറെ കവിളുചോപ്പിക്കും 
ഒറ്റയ്ക്കിരിക്കുമ്പോളെൻ ചാരു മേനിയിൽ 
ഞാൻ തന്നെയല്പ്പം വിരൽ നടത്തും 
കൈകൾക്കിടയിലായ് പൂക്കും മണത്തിലെൻ 
മേനി മുഴുവൻ തരിച്ചിരിക്കും !!
കണ്ണാടി കാണിക്കും നഗ്നമാം മേനിയിൽ 
കണ്ണെടുക്കാതെ ഞാൻ നോക്കി നിൽക്കും 
അന്യ സൌന്ദര്യയാഥാർത്ഥ്യചിറകുക-
ളൊക്കെയും കത്തിച്ചു ചാമ്പലാക്കും 
സങ്കല്പ്പകാന്തിയിൽ ഊതിയൂതി 
ചെറുതാലിയൊന്നു പണിഞ്ഞിട്ടെന്റെ 
കണ്ഠത്തിൽ ചാർത്തിക്കും ചാരുകൈകൾ 
എന്റേതു മാത്രമായ് തീർന്നിടണം 
എന്നുടെ മേനിയൊരാണിനെ തിരയുമ്പോൾ 
കൈകളിൽ രോമം ഉയർത്തെണീക്കും 
ചൂണ്ടുവിരൽകളിൽ മീശമുളച്ചെന്റെ 
ചുണ്ടുകൾ മെല്ലെ നനച്ചുതരും 
താക്കോൽ പഴുതിലൂടെത്തും വെളിച്ചത്തെ 
നൂലിൽ കോർത്തു ഞാൻ മാലയാക്കും 
എന്നിട്ടതുകൊണ്ടരഞ്ഞാണമാക്കിയെൻ 
ആണിനു പൊട്ടിക്കുവാൻ കൊടുക്കും !!
 എന്നിലെ പൗരുഷം പെണ്ണിനെ തിരയുമ്പോൾ 
തുടയിലെ രോമം കൊഴിഞ്ഞു പോകും 
നീരൊഴിഞ്ഞിളനീരിൻ മണമുള്ള 
നീരൊഴിഞ്ഞിളനീരിൻ  നിറമുള്ള 
സ്പന്ദനം തുടകളിൽ തങ്ങി നിൽക്കും 
പുറത്തുള്ലോർ പുഞ്ചിരിയാൽ പ്രഹരിക്കിലും 
അകത്തുള്ലോർ ആശയങ്ങൾ പറഞ്ഞീടിലും 
ആത്മാവിൽ തന്നെ രമിച്ചു സുഖിച്ചിടാൻ 
താക്കോൽ പഴുതുമടച്ചിടട്ടെ !!!!!!
എന്നോളം ഭംഗിയുള്ളാണുമില്ലാ 
എന്നോളം ചേലുള്ള പെണ്ണുമില്ലാ !!!!!!!!!!

Thursday 11 April 2013

പ്രതീക്ഷ

കറുക മുനമ്പിൽ പ്രതിബിംബിക്കും
പുതുഭൂഗോള സ്പന്ദങ്ങൾ 
വാക്കുകൾ മൊഴിയാ വാഗ്മി കണക്കെ 
മന്ദഹസിക്കും പുഷ്പങ്ങൾ 
മൃതിയുടെ മാസ്മര മേഖല പുല്കും 
ഗ്രാമീണതയുടെ സസ്യങ്ങൾ 
അമ്പലമുറ്റത്താലില പോലെ
വീണു കിടക്കും സ്വപ്‌നങ്ങൾ
 പാളികളില്ലാ വാതായനമേ 
നീ കാണിക്കും ദൃശ്യങ്ങൾ 
എന്നിലൊതുങ്ങാൻ പ്രേരിപ്പിക്കും 
ഇരുണ്ട ഭാരതസാരങ്ങൾ 
പാതയിലോഴുകും പലവർണ്ണങ്ങൾ 
വിലയ്ക്കു വാങ്ങും ഭോഗങ്ങൾ 
നിറഞ്ഞ സൗഹൃദ സ്ഫടികഗ്ഗോപുര -
മിടിഞ്ഞു വീഴും നാദങ്ങൾ 
പണവും പണവും തമ്മിൽ തല്ലി 
പതഞ്ഞു ചാവും തന്ത്രങ്ങൾ 
സ്മൃതിയുടെ പഴകിയ പൂഞ്ചേലയിലൊരു 
നിറം കെടാത്ത ചിത്രം പോൽ 
നിത്യവുമെന്നിൽ മിഴികൾ തുറക്കും 
പ്രത്യാശകളുടെ കിരണങ്ങൾ !!
ആയതിനാൽ പുതു വലകൾ നെയ്തെൻ 
മാവിൻ ചോട്ടിലിരിക്കും ഞാൻ 
വഴിതെറ്റിവരും പുഞ്ചിരിയെന്നിൽ 
മഴവില്ലൊന്നു പണിഞ്ഞാലോ !!!!!!!!!

Thursday 7 March 2013

പുല്ലാങ്കുഴല്‍ .....

ഒരു ചുണ്ടില്‍ പാടുന്ന പുല്ലാങ്കുഴലിനെ
പലപേരു  നിങ്ങള്‍ ചേര്‍ന്നൂതിനോക്കി 
പൊട്ടിത്തകര്‍ന്നതിന്‍ പുഞ്ചിരി വെട്ടങ്ങള്‍ 
ഈണങ്ങള്‍ മാറിയധ:പതിച്ചു .... 
ആരോരുമറിയാതെ  കാറ്റിനെ പ്രണയിച്ച 
പാഴ്മുളം കൂട്ടങ്ങള്‍ക്കിടയില്‍ നിന്നും 
കലവിരിയും കയ്യുകള്‍ കത്തിയുമായെത്തി 
ചെത്തിമിനുക്കിയെന്‍ മേനി തൊട്ടു 
ശാസ്ത്രംവിധിച്ചപോല്‍ സുഷിരങ്ങളിട്ടെന്‍റെ 
മേനി മുഴുവനും വേദനിച്ചു 
എങ്കിലും മൂകം സഹിച്ചു ഞാന്‍ സകലവും 
എന്നിലെ ഞാന്‍ ; ഇന്നതവനല്ലയോ !!!
ഒറ്റയ്ക്കൊരോരത്തു ചെന്നിരുന്നെന്നുടെ 
ചുണ്ടിന്‍റെ മീതെ ചിരി വരച്ചു 
എന്നിട്ടവനെടുത്തോമനിച്ചു ഞങ്ങള്‍ 
ചുണ്ടു പരസ്പരം പങ്കുവെച്ചു !!!
മേനി മുഴുവനും കോരിത്തരിക്കുമാ-
റീണങ്ങളൂതിയവനിരുന്നു ... 
ചുണ്ടിലൂടാടിക്കളിച്ചു വരും കാറ്റു 
ചൊല്ലിയവന്‍റെ മുഴുത്ത പ്രേമം !!
കാറ്റില്‍ കലര്‍ന്നുമിനീരിന്‍ കണങ്ങളാല്‍ 
ഋതുമതിയാവുകയായിരുന്നു .....!!!!
വേറിട്ട രാഗങ്ങളൂതിയൂതി എന്‍റെ 
മേനി മുഴുവനും വിള്ളല്‍ വന്നു 
അപ്പോളോരലപ്പം തകിടുവെച്ചെന്നുടെ 
ചുണ്ടു മുഴുവന്‍ പൊതിഞ്ഞു തന്നു 
വേദനയെല്ലാം മറന്നൊന്നൊന്നുറങ്ങവേ 
സ്വപ്നങ്ങളെന്നുടെ കൂട്ടുവന്നു 
പിന്നത്തെ പുലരിയില്‍ ഞാന്‍ കണ്ട ചുണ്ടുകള്‍ 
പുകയിലതിന്നവയായിരുന്നു ...!!!
ശ്വാസംപിടിച്ചുഞാന്‍ രാഗം പൊഴിച്ചെന്‍റെ  
നാഥനെ തേടുകയായിരുന്നു ..... 
പിന്നത്തെ പുലരിയില്‍ ഞാന്‍ കണ്ട ചുണ്ടുകള്‍ 
മദ്യം മണത്തവയായിരുന്നു ...... 
ശ്വാസംപിടിച്ചുഞാന്‍ രാഗം പൊഴിച്ചെന്‍റെ  
നാഥനെ തേടുകയായിരുന്നു ..... 
പിന്നത്തെ പുലരിയില്‍ ഞാന്‍ കണ്ട കണ്ണുകള്‍ 
കാമം പൊടിഞ്ഞവയായിരുന്നു ..... 
ശ്വാസംപിടിച്ചുഞാന്‍ രാഗം പൊഴിച്ചെന്‍റെ  
നാഥനെ മറക്കുകയായിരുന്നു .......!!!!!

Monday 4 March 2013


കൈലാസമെഴുതിയ  കവിതേ .... നിന്‍റെ
കാല്‍പ്പെരുമാറ്റത്തില്‍
കാതോര്‍ക്കുമെന്നുമാ
കൈലാസനാഥന്‍റെ നാഗഹാരം ...!!!
ഒരു കൊച്ചു കാറ്റായി ദേവദേവേശന്‍റെ
തിരുമുടിയഴകിനെ  നീ തൊടുമ്പോള്‍
ആകാശമാസകലം അംബരമാക്കുന്ന
പാര്‍വതീരമണന്‍ പുഞ്ചിരിക്കും .....!!!
നീഹാരമാലചാര്‍ത്താന്‍
നിത്യവും നിന്‍ മുന്‍പില്‍
നവവധു പോലെ വരും
ഗിരി നന്ദിനി .....!!
കരുണാമൃതമൊഴുകും
കൂവളക്കണ്ണിണകള്‍
മനസ്സില്‍ ജ്യോതിസ്സായ് ഉണരേണം....!!!!

Saturday 2 March 2013

ഉണര്‍വ്


പണ്ടാടിയ കോലങ്ങള്‍
പലതീവഴി വന്നിട്ടും
കൊണ്ടാടിയ ബന്ധങ്ങള്‍
പലവഴിയായ് പോയിട്ടും
വണ്ടലയും വാടികയില്‍
മണമില്ലാ മലരായ് ഞാന്‍
സന്താപം കൊണ്ടൊരുനാള്‍
സ്വരതന്ത്രികള്‍ പണിയിച്ചു
നെഞ്ചുരുകും രാഗത്തില്‍
നീ മീട്ടിയ പല്ലവികള്‍
തെരുവോര സ്വപ്നത്തിന്‍
കണ്ണിണകള്‍ നനയിക്കെ
ഉദരത്തുടിതാളങ്ങള്‍
അരിവാര്‍പ്പുകള്‍ പരതുമ്പോള്‍
അറിയുന്നോ നീ എന്നിലെ
വിറയാര്‍ന്നൊരു പ്രണയത്തെ ??
പ്രണയത്തിനു പേടിക്കാന്‍
പലതുണ്ടീയുലകില്‍
ഒരു കൊഞ്ചല്‍ കഴുവേറ്റിയ
കിളിമകളുണ്ടിവിടെ
തീവണ്ടിപ്പാളങ്ങള്‍
ദിശമാറും നേരം
പലതും വഴിവക്കുകളില്‍
തുണിമാറും കാലം
സ്വരമറിയാതിണപൊട്ടിയ
കവിതകളുണ്ടിവിടെ
നിണമണിയാതുയിര്‍ പോയൊരു
നഗരവുമുണ്ടിവിടെ...!!
മദ്യത്താല്‍ ചിന്തിക്കും
മാന്യതയുടെ നാട്ടില്‍
മട്ടൊഴുകുംവാണികളെ
നിങ്ങള്‍ക്കിടമുണ്ടോ ..??
ഉണ്ടെങ്കില്‍ തെളിയിക്കൂ
നിങ്ങളുടെ ശക്തി
ശേഷം ഞാന്‍ പ്രണയിക്കാം
പെണ്ണുണരും നിന്നെ ....!!!!!

പൊയ്ക്കണ്ണെഴുതിയ
തെയ്യത്തിന്‍റെ കണ്ണീര്‍
ഏതു ജന്മങ്ങളുടെ
തീര്‍ത്ഥമാണ്...??
ചിറകറ്റ ജഡായുക്കള്‍ക്ക്‌
ഇനിയെത്ര കാലം വേണം
പുത്തന്‍ ചിറകു വിരിച്ചു
നീലാകാശം തൊടുവാന്‍ ..??
ആടിക്കൊഴിഞ്ഞ
ചിലമ്പുമണികള്‍
ചിതറിയ സ്വപ്നങ്ങളുടെ
മൂക സാക്ഷികളാവുന്നു..!!
നിന്‍റെ നഖങ്ങള്‍ക്കിടയില്‍
പതുങ്ങിയിരുന്ന ആ
ചാരനിറമുള്ള പുഞ്ചിരി
എന്‍റെ ജീവിതം
അല്‌പ്പാല്‍പ്പമായി
നുള്ളിയെടുക്കുകയായിരുന്നു ...............!!

Wednesday 13 February 2013

സ്വപ്നങ്ങളുടെ താഴ്വരയില്‍ സര്‍പ്പഗന്ധികള്‍ പൂക്കാന്‍ തുടങ്ങുകയായിരുന്നു ...പടിഞ്ഞാറന്‍ കാറ്റിന്‍റെ സംഗീതത്തിലെവിടെയോ താളം തെറ്റിയ പല്ലവികള്‍ കാലിടറി വീണു .........ഉഷ്ണം കലര്‍ന്ന തണുപ്പില്‍ പരസ്പരം കെട്ടിപ്പുണര്‍ന്നുകൊണ്ട് അരയാലും ആര്യവേപ്പും പാതിമയങ്ങി ......ചുറ്റിലുമുള്ള ചാരക്കണ്ണുകളെ  കുറച്ചു നേരത്തേക്ക് അവ മറന്നുകാണും ....സ്വരതന്ത്രികള്‍ പൊട്ടിയ കല്ലോലിനിയായി ഞാന്‍ ഒഴുകുകയായിരുന്നു ...................കര്‍മ്മ പന്ഥാവിലൂടെ.............

Monday 11 February 2013

പൂനിലാവൂഞ്ഞാലാട്ടും
പുഷ്പവള്ളിയില്‍ വന്നിരിക്കും
നിശാശലഭമേ .............
ആരു ചാര്‍ത്തി നിന്‍ മേനിയില്‍
പുതുവെള്ള തുന്നിയ കമ്പളം ?
മഞ്ഞുതുള്ളിയില്‍ മുങ്ങിയുള്ളോരു
ഭാവനാ ഭവനത്തിലെ
പുഷ്പവാടിയില്‍ വന്നിരിക്കുക
തുമ്പമലരുകള്‍ പോലവേ ..
കാറ്റു കാണുകില്‍ കണ്ണു തട്ടുമാ
പൂഞ്ചിറകിലെ കാഴ്ചകള്‍ !!!
കടം വാങ്ങുമീ വെണ്മയെ
പുതു നിശാഗന്ധികള്‍ പോലുമേ ...!!
മയില്‍പ്പീലികള്‍ കണ്ണിറുക്കുമീ
കാല്പ്പനീകക്കുളിരിതില്‍
മെല്ലെ മെല്ലെയടുത്തു വന്നു
പിടിച്ചൊരുമ്മ തരട്ടയോ .........???

Saturday 9 February 2013

സംഭാവന

വികസനം കുളം തൂര്‍ക്കും കാലത്ത് 
ഞാനൊരു കുളം കുഴിച്ചു .........!!!!
പാരമ്പര്യത്തിന്‍റെ 
കൊമ്പു മുളച്ച മത്സ്യങ്ങളെ 
അതില്‍ നീന്താന്‍ വിട്ടു ..
പതുക്കെപ്പതുക്കെ 
അവരാക്കുളം വലുതാക്കും ..
തല കറുപ്പിക്കും ബാല്യങ്ങള്‍ 
ഷവര്‍ ബാത്തില്‍ 
നഗ്നരായാടുമ്പോള്‍ 
കല്‍പ്പടവുകളിലെ 
സൌഹൃദപ്പേച്ചുകള്‍ 
ജലതരംഗങ്ങളാകുന്നു ....
അക്കരെയിക്കരെ മത്സരിക്കാന്‍ 
നീരിനാല്‍ പൂക്കുറ്റി തീര്‍ക്കാന്‍ 
ഊളിയിട്ടപ്പുവിന്‍ മുണ്ടഴിക്കാന്‍ 
തോളില്‍ ചവുട്ടി മറിഞ്ഞു ചാടാന്‍ 
നഗരം  മടുക്കും 
നാഗരികര്‍ക്കായ് 
പണിതുവയ്ക്കുന്നു 
കാവും കുളക്കടവും 
തറകെട്ടിയൊരാലും 
ഒരു കറുകപ്പുതപ്പും ........


Friday 8 February 2013

തനിയാവര്‍ത്തനം

ആരുനല്‌കിയൊരാജ്ഞയാല്‍ വന്നു നീ 
പിറക്കാത്തവര്‍ മരിക്കും അറയ്ക്കുള്ളില്‍ .........?
ചന്ദ്രവംശത്തിന്നചാരനീതികള്‍ 
തന്ത്രശാലികള്‍ നിങ്ങള്‍ മറന്നുവോ ?
ഒരുവേള വഴിതെറ്റി വന്നുവോ സോദര 
എകാംബരധാരിണിയെന്നറിയാതെ 
ആകുകില്‍ പോകശുദ്ധിക്കിടംപെടാ -
തുമ്മറപ്പടി താണ്ടാതെ സോദരാ .....
ആരെഴുതി നിന്‍ ജാതകം ദ്രൌപതി ??
ഓര്‍ത്തു തെല്ലിട നിന്നു ദുശ്ശാസ്സനന്‍ 
പിന്നെ ഉള്ളില്‍ ഒളിപ്പിച്ച ദംഷ്ട്രകള്‍ 
കാട്ടിയട്ടഹസിച്ചു കുബുദ്ധിമാന്‍ 
പാണ്ഡവര്‍ക്കു വിരിച്ച പൂമെത്തയില്‍ 
കൌരവ വിയര്‍പ്പിന്‍ ഗന്ധമേല്‍ക്കുകില്‍ 
ആശ്രയമാരുമില്ലാത്ത പൈതലേ 
വേണ്ടയെന്നു നീ ചൊല്ലുമോ ചൊല്ലുക ??
ശങ്കയുള്ളിലോളിപ്പിച്ച കണ്ണുകള്‍----==-_ 
കൊണ്ടൊരേറുകൊണ്ടത്തനു തളര്‍ന്നവന്‍ 
അഗ്രജന്‍ വാക്കില്‍ നിന്നെടുത്തൂര്‍ജ്ജത്താല്‍ 
നീണ്ട വാര്‍മുടി ചുറ്റിപ്പിടിച്ചുടന്‍ 
കേള്‍ക്ക നീയഭിസാരികേ നിന്നെയും 
ചൂതുവെച്ചു കളിച്ചു ഹതാശികള്‍ 
പാണ്ഡവരവരല്ല ശിഖണ്‍ഡികള്‍
പാണ്ഡ്ു വംശത്തിലെ വിഡ്ഢി രാക്ഷസ്സര്‍ !!
ആകുമോ അവര്‍ക്കെന്നെ ജയിക്കുവാന്‍ 
ശകുനി മാമന്‍റെ ബുദ്ധി ജയിക്കുവാന്‍ ??
ഒന്നറിയുവാനുണ്ട് കേള്‍ക്കട്ടെയെന്‍ 
ഭീമനെന്നെ പണയമായ്‌ ചൊല്ലിയോ ??
ഭീമനെന്നുള്ള വാക്കടിയേല്‍ക്കയാല്‍ 
ഭീമമായൊന്നലറീ ദുശ്ശാസ്സനന്‍ 
പഞ്ചപാണ്ഡവര്‍ വെച്ചിരിക്കും നിന്‍റെ 
പഞ്ചതയടക്കീടുമേയിന്നു ഞാന്‍ 
എന്നു ചൊല്ലിയാ പെണ്ണിന്‍ മുടിപിടി -
ച്ചാര്‍ത്തഴിച്ചു ചൂതാടികള്‍ മദ്ധ്യത്തില്‍ ,
കാണ്ക ലോകമേ കമനീയ മേനിയില്‍ 
കരപുരണ്ടോരീ ചാരു ചിത്രങ്ങള്‍ 
നിര്‍ന്നിമേഷനായ് നിന്നുപോലന്ധനും 
നിഴല്‍ ചിത്രത്തില്‍ പൊങ്ങിയമരുവാന്‍ 
ഇത്ര കാലമായ് കാത്തുവെച്ചുള്ളോരീ 
കണ്ണുനീര്‍ പോലെ ശുദ്ധാഭിമാനമ്മി -
ന്നീ കഴുകന്മാര്‍ക്കു കൊത്തിപ്പറിക്കുവാന്‍ 
നല്‍കിയോ ലുപ്ത മാനവ സ്നേഹമേ ...!!!!
ഇടനെഞ്ചില്‍ ഉരുകും ശരീരത്തിന്‍ 
പൊള്ളലേറ്റലറിപ്പറഞ്ഞീടിനാള്‍ 
ചേലയൂരുന്ന കാമനീരാളികള്‍ 
കാലങ്ങളിലേക്ക് കയ്യുകള്‍ നീട്ടും ....
ആകയാലെന്നനുജത്തിമാരെയീ 
ചോരയില്‍ നിങ്ങള്‍ ശക്തി കലര്‍ത്തുക ....
നാവാടും തീയുകള്‍ നീളെപ്പരത്തുക 
നാശം ചെറുക്കുവാന്‍ ലോകം ജയിക്കുക .......!!!!

Tuesday 1 January 2013

എവിടെയാണ് നിന്‍റെ  വിതുമ്പലുകള്‍ അലയൊലികള്‍ തീര്‍ക്കാതെ മാഞ്ഞുപോയത്...? മുന്നിലെക്കുള്ള പാത പഴയതാണെങ്കിലും സഹയാത്രികര്‍ പുതിയവരാണ് ...... അലോസരപ്പെടുത്തുന്ന വാക്കുകള്‍ ചുമലില്‍ ഉണ്ടെങ്കിലും എന്തോ ഒരു പ്രത്യാശ മുന്നിലേക്ക്‌ നയിക്കുന്നു ..... ആഡംബരമില്ലാത്ത പുഞ്ചിരികള്‍ ഏതോ ചുണ്ടുകള്‍ തേടി അലയുമ്പോള്‍ എന്തിനാണ് കവിളുകള്‍ തുടിക്കുന്നത് ....? താരാപഥങ്ങള്‍ കറങ്ങിയെത്തും കാലത്തില്‍ നീ മാത്രം നിരാശയുടെ നീര്‍ചോലയില്‍ കാല്‍ നനയ്ക്കുകയാണെന്നോ ...? ചോദ്യങ്ങളെത്ര !!! ഒറ്റയുത്തരത്തില്‍ നമുക്കൊതുക്കാം അല്ലെ .....മൗനം ...!!!!!!!